Къачхы шахар. Кюн батхандан джел урад,
Къайгъы салыб, тёгерекни сарната.
Бир онгсуз къарт джол джанында олтурад,
Озгъанлагъа джыйрыкъ къолун узата.

Къач тартады, алгъыш айтад чомартха,
Ышаръшса, кириулери кёрюнед.
Кёк кюкюрейд чамланнганча бу къартха,
Сууукъ джангур зарланнганча себелейд...

«Бош къазама хурджунуму мен чомарт
Болама деб, айлыгъымы алама —
Деб бардым да, айлыкъ джогъед, ийнан, къарт,
Энди юйге джаяу кетнб барама».

Кёкге къараб туруб, кесек симсиреб,
Таягъы бла джол тюзете атлавды,
Челекденча джангур къуяд, «къора!» — деб.
Ким биледи, къартны кими сакълайды?

Онглу халкъгъа санамайма мен аны,
Садакъачы эсе джангыз бир къарты!
Джокъду, джокъду бу Аллахсыз къралны
Тамблагъа да ышанырча бир шарты...

1983 дж.