Башчы болгъан къар бурхучукъ акъ къаз кибик сюзюлед,
Ызындан а, мычымайын бурчакъ сюрюу тизилед.
Бир кёзюуде, ауаз бере, чабыб джетсе джел элге,
Джангыз тургъан тал терекчик ушайд соруу белгиге.

Ойрасы:
Бюпон къылсын хар ким билген намазын!
Истемейме къышхы джелин, аязын!
Сюеме—деб, айтханды да ариуум,
Джазгъы кюнден онглуд мени къарыуум!
Озгъанлагъа джылыу бере, ышара,
Мен барама ариууму ашыра!

Элге къаблайд къыш акъ тонну, саугъа бере болур ол?
Чюйре тонну эки дженги— элден чыкъгъан эки джол.
Къар тохтады солуу излеб, къозгъалдыла адамла.
Хар аякъ ыз— къобуз тиек, бассанг, чыгъа макъамла.

Ойрасы.

Акъ чананы тартхан акъ ат, ол акъ болур таб къардан?!
Къонгурауу макъам тёге, ташаяды къарамдан.
Кюн къубулад, келин кибик, ау джаулугъу— булутдан,
Къараса уа кюмюш джерге, минг кёз салад накъутдан!

Ойрасы.

1985 дж.