Ышарыучан эдим сюйгенлеге,
Сюймеклик отунда кюйгенлеге,
Самаркъау этиб мен кюле эдим
Ахсыныб башларын тюйгенлеге.

Ойрасы:
Джазыуум насыб ийди,
Сюймеклик ауруу тийди,
Ёмюрде кишини сюймегенча,
Джюрегим сени сюйдю!

Сен татлы тюш тюлсе, сейир тюнсе,
Кёзюмю алдагъан кёзбау тюлсе,
Кече толгъан айса, кюндюз кюнсе,
Сен джашил талада къызыл гюлсе!

Ойрасы:
Тюшюм тюл, тюнюмсе сен,
Айымса, кюнюмсе, сен!
Джашил талада къызыл гюлюмсе,
Джанымса, тинимсе сен!

Тенгизни тюбюнде инджисе сен!
Омакъдан ёлесе, гинджисе сен!
Сен— алтын джюзюкню накъут тащы!
Джерде ариулукъну, — сен, — чынг башы!

Ойрасы:
Тенгизде инджимсе сен!
Эм омакъ гинджимсе сен!
Сен — алтын джюзюкню накъут ташы,
Ариулукъну чынг башы!

Не айтдым, не къойдум махтау теджей?!
Сёзюме ийнандынг сен да менлей,
Бир кюн а уллу кёллюлюк этдинг...
Башымы тюеме мен тенгимлей.

Ойрасы:

Кюлме, — дейдиле, — джашха,
Келир, — дейдиле, — башха,
Ахсыныб, башымы тюеме мен,
Башым ушаб суу ташха.

1975 дж.