Сагъыш эте бу къыйынлы халкъыма,
Замансызлай къыйын джолну сайладым,
Биле бугъоу аллыгъымы хакъыма,
Джюрегими азатлыкъгъа байладым.

Азат сезим къонуш болгъан кёлюмден
Айдамайла джангызлыкъны джылларым,
Макъам алыб деу тенгизни джелинден,
Согъадыла таймай джюрек къылларым.

Эшитмейди кёблюк джелни макъамын,
Джюрегинден сангыраугъа айыб джокъ...
Эшитген да къоркъуб, битейд къулагъын,
Анга макъам неди, къарны болса токъ?!

Къурч бедженле кёбге тыйгъыч болмазла,
Ол макъамны азат толкъунларына,
Хар инсаннга эшитилгинчи талмазла,
Буштукъ тыкъсала да къулакъларына!

Кёк Къобан мерекеб болса, джетерми,
Ол макъамны чууакъ кёкде джазаргъа?
Муратымы кёрсем, кючюм джетерми,
Къууаннгандан ёлюб къалмай джашаргъа?

1979 дж.