Ышарыргъа кюрешсем да,
Ышармайды чырт джюрегим,
Тенг къызланы ичлеринде
Кёрюнмейди Аймёлегим

Келликди деб ышансам а,
Сакълар эдим бек ашыгъыб,
Нек кечигиб къалгъанды? —деб,
Къарар эдим джолгъа чыгъыб.

Эшиклени бауларында
Бир излейим къол ызланы,
Барайым да тансыкълайым,
Ол келиучю таш джолланы.

Кёрмесем да, къалгъан болур
Бир джерчикде аякъ ызы?
Кесим джангыз болсам, келир
Къулагъыма шош ауазы.

Джел шималдан ура эсе,
Къысха-къысха бир солуюм,
Ол солугъан татлы хауа
Келе болур, бир тогъуюм.

Бу болумдан къачалмайма,
Амалларым—дыгаласдан.
Къайры къачыб къутулайым,
Бугъоу салгъан сагъышладан?

1975 дж.