Джол бошалмай, борбайланы къыяды,
Джюрексиниб, танкны ызындан сюреме,
Противогаз тылпыууму тыяды,
СЕНИ танкда байракъныча кёреме.

“Артха къалма, сен кесинги къолгъа ал!” —
Деб кюлесе, узатаса къолунгу...
Танк тохтайды. Ышарылыб сен: «Сау къал!» —
Деб, тас бола, къысхартаса джолуму.

Чыммакъ тюзню ахырындан кёз алмай,
Биз барабыз. «Джырла!» — буйрукъ чыгъады.
Джырыбыз да бошалгъынчы, тёзалмай,
«Хауа!» буйрукъ солдатланы джыгъады.

Мен акъ къаргъа бауурумдан джатама,
Акъ орунда сен да джата болурса?
Мен сюркелиб къаргъа хапар джазама,
Сен да акъ къагъытха джаза болурса?

1977 дж.