Марий, алдым сени джазгъан письмонгу,
Ба этеме мынга тийген къолунгу.
Джангыз сенсе джарыкъ этген джолуму!
Джарыкъ джокъду мени санат ишиме,
Ушамайды энди тюнюм тюшюме,
Бюгюнлюкде ийнанмайма кишиге!

Бир-бирледе ийнанмасам кесиме,
Мурдар акъыл келиученди эсиме...
Чинг аллында атлагъанмем терсине?!
Санат ишде барды къуру эки джол:
Сюйсенг, кёзбау махтау ючюн учуз бол,
Не уа, таза ёл да, сен ёлюмсюз бол!

Бир закий да табхан болмаз ортасын,
Мен а, чыртда кёралмайма арасын,
Сюелеме джарты джолда болуб сын.
Джазгъан эди кёб болмайын къарт атам:
«Ёмюр чакълы озгъанында арадан,
Чыгъалмады халкъыбыздан бир адам...»

Къаргъагъанмыд халкъыбызны табигъат?!
Огъай, огъай, фахмулуду джамагъат!
Джанны къурман этсенг сюед деу санат!
Бюгюн бизде джокъду джанын бераллыкъ,
Табыллыкъ да болур санын бераллыкъ...
Джокъду, джокъду уллу ишде орталыкъ!

1986 дж.