Джашпыкъ къонакъ этер деб, ОЛ ышаныб,
Шахар паркда олтурады джангызлай.
Боз булутну къыйырындан ышарыб,
Кёлеккенги нёгер эт—деб, теджейд ай.

Ушакъ этед ауазы бла аязны,
Къачхы тилде хапар айтад ол анга.
Сагъышында тансыкълайды бир джазны,
Санаб аны джангызлыкъдан дарманнга.

Джанкъылышча ариууну сыфаты
Чакъырады бир белгисиз джоллагъа,
Сагъышыны болгъан кибик къанаты,
Учуб барад озуб кетген джыллагъа.

«Джанкъылычны» джеталмазын эсгере,
Бой салады къайтыб къачхы эсине,
«Ма бу халда эм азында джюз кере
Болдум! Къойдум!»—деб, сёз беред кесине.

Мутхуз кёк да чууакълыкъны онгсуна,
Ачылады. Талпыйд ай нюр себерге.
Деу наратла камсык джелге бойсуна
Чайкъалалла, булутланы сибире.

1985 дж.