Мени онгсуз кюнлеримде
Чакъырылмагъанлай джетген,
Мен ётерик кёчюулеге
Кёкюрегин кёпюр этген.
Ёз кёзлери бла Малкъарны
Манга джандетча кёргюзген,
Ёз джюреги бла да Аны,
Кеси сюйгенча сюйдюртген,
Башы акъылдан толгъан,
Иннети таза болгъан,
Тутушууда уста эрге,
Керти фахмулу поэтге
Додуланы Аскерге атайма.


Джюрегинде пелиуанлыкъ джашагъан,
Ариулугъу сюймекликге ушагъан,
Тау намысы ушаб тауда акъ къаргъа...
Джаным къурман болсун Джуртум Малкъаргъа!

Ойрасы:
Мен бетиме салсам къолун анамы,
Беш бармагъын Беш Тау Эли сунама,
Эринлерим съшасала аланы,
Сау Малкъарны уппа этген сунама!

Зар кёз тие кёк суууна, ташына,..
Ариулугъу душман бола башына,
Таш башында амал табхан джашаргъа,
Джаным къурман болсун таджал Малкъаргъа!

Ойрасы.

Тешдиртмеген тинин зорлукъ садакъгъа,
Сюрпонде да тилемеген садакъа,
Дерт тутмагъан Аллах берген къадаргъа,
Джаным къурман болсун шыйых Малкъаргъа!

Ойрасы.

Джаным саудан ачхан джандет эшигим,
Ёлсем, рахат джукълар топуракъ бешигим,
Ата Джуртум, Ана Сютюм, Къадарым —
Джаным къурман болсун санга, Малкъарым!

Ойрасы.

1995 дж.