Онгсунмайын сууукъланы,
Уяналла таулу элле.
Къач къурагъан макъамланы
Сызгъыралла хашген джелле.

Ток джюрюген чыбыкъланы
Къылла этиб согъадыла.
Сюрюб, элтиб чыпчыкъланы
Шорбат тюбге сугъадыла.

Къарт бусакъны чапракълары
Юзюлелле хыны джелден,
Сууукъ кёлню джыйрыкълары
Толадыла сепкилледен.

Сууукъ джангур тунчукъдурад,
Ёшюн ургъан сары джелни,
Чирчикледен эти толад,
Орамлада джалан джерни.

Ма бюгюннге къарагъанча,
Барды элни бушуу иши,
Бир юй таба барадыла,
Бёлек-бёлек къатын, киши...

Бу дунияны хаух болгъаны
Быллай кюнде артыкъ да бек
Ачыкъ бола, сезиб аны
Къаты урад бирде джюрек.

Джюрек къууанырча, кесек
Шарты да джокъ ма бюпонню...
Былайсыз биллик болмазек
Багъалата чууакъ кюнню?

1982 дж.