Эртденликде сууукъ сингнген таулагъа
Кюн нюрюнден джылы чепкен бичеди.
Чыпчыкъ джырла тынчлыкъ бермей хауагъа,
Хауа къызыб эртден чыкъны ичеди.

Билеу джылан къурч чалкъыны ауузундан
Ёлюм къара дюрю тюбге къачады.
Бёдене да, къутулдум дей аджалдан,
Чёб башланы къалтырата учады.

Сепкилкъанат гёбелекке, хауада
Уча келиб, мант башына къонады.
Джюджю базар къозгъалгъанды забада,
Кюн тюбюнде джашил дюрю онгады.

Бал чибин да хайыр табмай тюшюнден,
Бурунчугъун гокка хансха кёмеди,
Бир кесекге солуу таба ишинден,
Баш кёлтюре, кюн таякъны эмеди.

Тал терекчик, бир кёзюуде шыбырдаб,
Аязчыкъны харифлерин окъуйду.
Каска согъад сыбызгъысын алай таб, —
Ол макъамны аяз кюсеб тогъуйду.

Кюннге бетин ачхан гюлча, хар джюрек
Тазалыкъгъа кесин алай ачады.
Джер къууанчха болмагъанча чыртда чек,
Хур табигъат къайгъъшаны чачады.

1981 дж.