(Чымыкланы Чакъгъан деб тулпар ат болгъанды)
Сени анангы ючлю болуб мен табха эдим,
Андан эсе бу къара джерни мен къабха эдим.
Клиса къагъылса, орус индекледе къоян кибик бугъуучу,
Джауланы аллына ёхтемлениб пырх-чырх эте чыгъыучу.
Нелер айтасыз бу Чымыкланы Чакъгъаннга,
Тик ёргеге джюз джыйырма пудну тартханнга.
Тайлыкъдан башлаб бу къыргъый белин сылатхан,
Джангыз кечеге сюйген иесин джылатхан.
Мен барама кюмюш джюгенни узатыб,
Сен джатаса агъач таланы къызартыб.
Къош къулакълы къошун туякълы къара атым,
Сен ёлгенли сыннганды мени къанатым.
Чымыкланы Чакъгъан деб тулпар ат болгъанды.