Алтын джерни бёлегенча кебиннге,
Замансыз къыш кирди къачны чегине.
Энди кёб да турмай джерге танг атар...
Къыш сагъышха кирди: (сабыр болду къар)

Ким биледи, ышаныу джокъ, кюн чыгъар,
Керти кючюм келгинчиге, ол хорлар?..
Ашыкъгъан суу джетмейд, дейле, тенгизге,
Заман джетсе, кёргюзюрме мен сизге!

Бир белгисиз къайгъы-сагъыш кибик, къар
Тереклени бутакъларын басыб, хар
Бутакъчыкъ да кетгенчады шеждеге.
Танг болумну джоралайды игиге...

Къыш а, тангны нюрюн теджеб кесине,
Джерге къараб алай айтад: «Терсине
Ишлегелле меннге дери къыш-ханла!
Мен а, джерде джашау этген инсанла

Джарыкъны да, джылыуну да сезсизле,
Деб келгенме, бир кесекчик тёзсюнле!
Алдай эсем, шагъат болсун шохум кюн,
Экибиз да бирбиз сизге ма бюпон!»

Къышны кёзбау сёзлеринден сыйланыб,
Кюн сакълыгъын тас этеди ийнаныб,
Кюрешеди булутладан къараргъа
Накъут кёзле салама деб къарлагъа.

«Бу сууукъчукъ бир джаннга да джукъ этмез,
Джылыу келир, джигитирек тешин тез,
Ол джарауду, толу ийнан сен — анга...»
Деб ышарад кёзбау къыш хар инсаннга.

Башлайд ишин джылтырауукъ сёзледен,
Сууукъ ачыу кетмей къышхы кёзледен.
Ма башлады сууукъ аяз джоргъалаб,
Ийнаннганла игиликге джоралаб,

Сакъладъша тёзюб, къыш а къысды бек,
Тешиннгенле бузладыла хариб терк.
(Бюгюн джакъ болалмагъанны кесине,
Ёлсе, киши сала болмаз эсине?)

Бир къауумла лагъымчыла болдула,
Амалсыздан къышха махтау салдыла,
Къаршчы тургъан болса, ол а къышха не?!
Буз къолу бла урад аны бетине.

Тохтамаса, джагъасындан тутады,
Сюйрейди да шимал таба атады.
Ол да къайтса, сыныб къайтад юйюне,
Тынгылайды джюрегини кюуюне.

Кюрешсек да булутланы чачаргъа,
Быллай къышны тыяр илму бюгюн джокъ.
Бармъщ мадар, джокъмуд, алай джашаргъа —
Кюн джылыудан хар джан болур кибик токъ?!

Халкъым алай айтад: «Тёзген тёш ашар»,
Ким сууукъгъа тёзюм табса, ол джашар.
Къысхартайыкъ джазны джерге келлигин,
Къышны къара бетли болуб ёллюгюн!

1985 дж.