Джолоучула къум борандан къутулуб,
Келе-келиб бир къуюгъа джетдиле,
Андан аслам ичген, кёрге — джутулуб,
Къалгъанла да онгсуз болуб кетдиле.

Эс джыялмай ол къуюну ууундан,
Суусаб болуб, экинчиге джетдиле,
Кендирденча болуб аны сууундан,
Аман айта, джырлай, тепсей кетдиле.

Бара-барыб джыйдыла да эслерин,
Мырды суулу бир къуюгъа джетдиле,
Суусаб болуб, тыялмайын кеслерин,
Ичиб, ауруб, мычыб, кючден кетдиле.

Тёртюнчюню сууу таза, кемсиз аз,
Бешинчини сууу да аз, бети саз...
Къандырмады кишини да суусабын,
Джол джутады джамагъатны ийнамын.

Бир бёлекчик къырчырады: «Алгъа!» — деб,
Тас этгелле бирле адам шартларын,
Бирле къумну къазадыла суу излеб,
Джол а сабыр эте барад артларын.

Насыб излеб чыгъыб, джолда седирей,
Халкъны башы къалды уллу палахха,
Онглуракъла барадыла тентирей,
Онгсузла да табыналла Аллахха.

Джетгендиле алтынчы бир къуюгъа,
Сууу кёбдю, таб-тазады ол, ёзге
Ийнамсыз халкъ къарайд анга буюгъа,
Билмей андан ичерге бла ичмезге.

Алайсыз да ёллюк эсек, ичейик! —
Деб, ичдиле, къайтды адам шартлары.
Ёчешдиле, аралары болуб тик,
Ким биледи не боллугъун артлары?

1985 дж.