Джазгъы ингир къара джамчы кийгенди,
Сууукъ джангур джабалакъгъа джол ачад,
Ёзен суучукъ суу ташла бла талашад.
Кишен салыб хар джаш атын ийгенди.

Дорбун къошда, шынкъартчыкъны къатында
Олтуралла джашла, лахор этелле,
Бёгек къушча джашлыкъны къанатында
Ушакълары бирер джары элтелле.

Сабыр бола джабалакъ да тохтады,
Ёзен суучукъ арыгъанды талашыб.
Азыкъ къыбыб, джыйын рахат джукълады,
Эски, кенг-кенг мурджарлагъа джарашыб.

Отну къызъш тилчиклери джутланыб,
Кебген чымыртачыкъланы джалайла,
Татлы джукълагъан джашлагъа сукъланыб,
Гёзет этген эки джаш да къарайла.

Эшитилелле хур-хурлары джашланы,
Къайсы эсе да тюшюнде сёлешед,
Ким бла эсе да, бир белги ташланы
Арлакъ салама деб, къызыу ёчешед.

1975 дж.