Къарангы орнунда тебджилдейди,
Джел этед оджакъны сыбызгъы,
Макъамы джюрекни джесирлейди,
Тыйгъычсыз кючюне къызыныб.

Ангымы тартаргъа тюзелелле,
Джашлыкъны мукъладис джыллары.
Согъаргъа излесем, юзюлелле
Джазыуну тотсуннган къыллары.

Къарамы къаманы ауузуча,
Тиними толтурад табладан,
Джукъласам да, АНЫ ауазыча,
Бир ауаз тёгюлед тауладан.

Заманнга кесими хорлатханма,
Таныгъан бетимде да окъур.
Сюйюмлю сыфатны унутханма...
Джарыкъны унутамыд сокъур?

Къарангы къартлыкъдан агъарады,
Джел ауузун айырад оджакъдан,
Бир мурат джарыкъгъа чакъырады,
Джюрекни толтуруб джомакъдан.

1984 дж.