Субай санлы, джарыкъ къанлы. юй бийчем.
Апкъын мени бийим тюдцю джазыуум...
Эсирирге деб, кесек да мен ичмем,
Уллу эди бюгюн мени джарсыуум.

Ангылатыб айталмайма мен аны,
Ангылаталсам, боллукъ эдим пайгъамбар,
Джарсыу кючлеб къойгъан кибик дунияны,
Кёрюнеди бирде джашау алай тар.

Ауузуму сёзлеринг бла киритле!
Алай, айтма, ичгиди, — деб, — аурууунг!
Эсирирге деб ичмейле поэтле,
Ичедиле джер джашауну джарсыуун!

Мыдах кёзлю, акъыл сёзлю, юй бийчем,
Кёбге тёзген, умут юзген, джан бийчем,
Мен салдым бой, кеч да бир къой, бал бийчем,
Ма кёрюрсе, танг бир атсын, мен ичмем.

1986 дж.