Къалай къыйынд тубан кюнде джолоучу болгъан.
Джолдан эсе къыйынд меннге юйюмде къалгъан,
Нек эсе да, бюгюн юйюм ушамайд юйге,
Тубандача... Джазгъан джырым ушайды кюуге.

Джууукъ олтурсам да ашдан толу тепсиге,
Джюрегим а ач болады, къарыуун тёге,
Тохтаб къалад дегенча, мен турама ёрге,
Ма бу болум, ашырад деб къоркъама кёрге.

Бир белгисиз тансыкълыкъ бла бир мыдах сезим
Талайдыла, къутулалмай аладан кесим,
Мен тилейме, шош къадарым, тилейме сенден,
Тансыкълыкъ бла мыдахлыкъны бир ал эсимден.

Къарашауай эмиб ёсген бугъойлагъа элт,
Бир кечеге сен аланы анда къонакъ эт,
Танг атханлай, кюн тийгенлей эрирле ала,
Тенгиз таба джогъалтырла акъджал толкъунла.

1979 дж.