Къар жауады, боранды,
Байны неси къорайды?

Тоханада жатады,
Малын багъа сатады.

Къуу тёшекде жатады,
Кёз илишан атады.

Кюн къайгъысыз батады,
Танг ашыкъмай атады.

Нёхю ахча санайды,
Кёп эсе да, къанмайды.

Жашауу байны былайды,-
Жарлыланы талайды.

Къызы чачын тарайды,
Бай жашлагъа къарайды,

Жашы эсирип ауады,
Къар а тынмай жауады.

Къул къалтырай эшикде,
Хыбырт тону – тешикли!

Таш юйюнде от этмей,
Ашаргъа ашы жетмей,

Ишлейд белин тюзетмей,
Къыйынлыкъ андан кетмей.

Жашайла байла былай,
Къарын жауларын сылай.

Жылкъычы тюзде бузлай,
Отунчу ачдан жиляй,

Аямаяын жанларын,
Ырмах этип санларын,

Сууукъ бузуп къанларын,
Ишлеп жашагъанларын, -

Бай эсине алмайды,
Аллахдан къоркъмайды.

Жарлыгъа къарамайды,
Жукъгъа да санамайды.

Жукъ айтыргъа жарамайд,
Айтса, патчах унамайд.

Байны къайгъысы жокъду,
Юсю, къарны бек токъду.

1856