Ай Чёпеллеу, къонагъым,
Бюгюн санга сёзюм бар, –
Узакъ жолдан къайтханса,
Къайтхан кибик файгъамбар.

Сени кёзюнг ачыкъды, –
Орус тилин билесе,
Бу жол да кёп жер танып,
Батыр болуп келесе.

Сени кёзюнг ачыкъды, –
Кёп жерлени кёргенсе,
Кёп китапла келтирип,
Манга къууанч бергенсе.

Сени бу китапларынг
Сахтиянда, чилледе.
Не зат айта болурла
Мен билмеген тилледе?

Ай, мен жарлы, тил билген
Болсам эди, сенича,
Шималланы къыдырып,
Хапар билип келирча!

Сени китап юйюнгде
Кёп кюнлени булжудум,
Алай дуния жарыгъы
Бу китаплада сундум.

Ай, Чёпеллеу къонагъым,
Жокъмуд манга бир мадар,
Орус тилни сырларын
Араб тилича ачар?

1906