Къулакъ къакъгъан такбиринг –
Ич алтысындан бири.
Къулакъ къакъгъан дунияны
Къоюп, намазгъа кирир.

Экинчиси – ёрге турмакъ –
Фарызды ол саулагъа.
Ёрге турмакъ борч тюйюл
Саусуз-къыяулулагъа.

Ючюнчюсю – Къурандан
Окъу юч аят къадар.
Билмеген аллай бирни –
Билирге этсин мадар.

Тёртюнде – башны, белни
Ийилтип рукъу этиу.
Бешинде – мангылайы,
Бурну сеждагъа кетиу.

Алтынчысы деп айтсакъ –
Аттахиятха олтурур.
Бу затланы битдирген –
Этер борчун толтурур.

***

Аллах, сангады махтау!
Сен тюзетип, башладым.
Ибман-ислам китабын,
Сен болушуп, бошадым.

Аллахым, сен къабыл эт
Мени бу китабымы,
Къабырда, къыяматда
Сен тынч эт хыйсабымы.

Аллах, сен файдалы эт
Муну хар муслийманнга.
Ыразы бол бу китапны
Алагъа деп жазгъаннга.

Я Раббий, кеч, жазыкъсын
Муну окъугъанлагъа.
Дагъы жазыкъсын мынга
Тынгылап тургъанлагъа.

Барыбызны тазала
Кёп хаталарыбыздан,
Гюнахларын да къурут
Ата-аналарыбыздан.

Зулмуланы чайнатма
Мукъминлени барына,
Ахыратда кийирме
Жаханимни нарына.

Амин, амин, я Къариб!
Амин, амин, я Ракъиб!
Амин, амин, я Наджиб!
Амин, амин, я Муджиб!