Къабырлагъа Къарайма, келюм-такъыр,
Ахыр юйюнг мындады, Кязим факъыр.
Хаух дуния алдаулуду, болма батыр,-
Саулугъунгда аллах деп, ийман чакъыр.

Кетгендиле садакъ окълай жигитле,
Оюлдула кез жетмеген бийикле.
Къара жерде мелхум кырдык болдула,
Жалаулада женгил чапхан кийикле.

Огъурсузла, огъурлула кетдиле,
Къоркъа-юрке, къара жергекирдиле.
Керти юйлерин барып анда кердюле,
Бу дунияны алдаулугъун билдиле.

Ма бу къабыр… Ай, Мубарик Бияслан,
Къазауатда ёлюп кетдинг, жарлы жаш.
Кёкюрегинг болду тарда илишан, -
Кёплерибиз къайтмадыла урушдан.

Керти сёзню айтыуученг хоншубузда,
Болушуученг, агъачха къолунг уста.
Гюрбежими эшигин, терезесин
Ишлеп бердинг, борч этмей бойнубузгъа.

Жаннетни сен къонагъы бол, мубарик,
Къыямат кюн жарыкъ бетден тюбейик.
Ёлгенлеге рахму, кечим тилейик,
Бизден умут этедиле, билейик.

Бу къабыр а… Таныгъанма, Шио факъыр!
Жарсый эдинг, жеринг, юйюнг ишлединг,
Таш тюе, жашадынг, тирмен ишлединг,
Киши къыйын ашамай сабийлеринг.

Энтда тартады ун сени тирменинг,
Бузулмай турадыла илипинлеринг.
Шиону тирмени деп эллилеринг,
Келедиле ауур жюклеп эшеклерин.

Бу гыйы таш… Рахай Чокурну сыны,
Сау тукъумда аыйырма эди сырынг!
Юй ишлединг бек бийикге чыгъып,
Ёлюп кетдинг юркген атдан жыгъылып.

Деу эдинг, - ёгюз жюгю агъачланы
Тар ичинден чыгъарыученг кётюрюп.
Кёп тюйюлдюнг, аркъангы жауур этип,
Кюн кёрмединг, ол да тюйюл ётюрюк.

А, Шакъманланы Тарюк, сыйлы бийим…
Бий эсенг да, кёргенсе жашау кюйюн.
Байлыгъынгы, хурметинги аямадынг,
Тау элинге къалкъа болуп жашадынг.

Бызынгыгъа ёлет аруу киргенде,
Кюйдюрюрге патчах аскер ийгенде,
Игилени жыйып барып тийренгде,-
Ёшюн салып, ётдюрмединг сен ёрге!

Тынч жат, Тарюк, жашадынг элгендирмей,
Мадар сурап, арбазынга келгенлени.
Озмадынг, атдан тюшюп, салам бермей,
Жокъ эди Шакъманлада, Тарюк, сенлей!

Сенмисе, Шакъманланы Аслангерий?
Тармыды, такъырмыды жатхан жеринг?
Ай жазыкъ, кюе болур сюеклеринг,
Эсинге тюшюп мында этгенлеринг.

Сен бийлени бек залими болуученг,
Жарлыланы аркъаларын союученг…
Къойчуларынгы азыкъсыз къоюученг,
Уялмай, киши къыйынындан тоюученг.

Сабанлада, чаллыкълада жетиученг,
Жарлылагъа ат оюнла этиученг.
Жыйгъанларын суулай талап кетиученг,
Ай, мынафыкъ, чекден аман ётюученг.

Не элтгенсе биргеннге топуракъгъа?
Къара жерге – ол сыйлы опуракъгъа?
Бары къалды, ёзюнг атландынг хакъгъа,
Жаханим ит болуп тюшдюнг тузакъгъа.

Къой, Кязим, ёлгенлеге сен эт хатыр,
Хар кимни терсин, тюзюн аллах айтыр.
Олтур да, къуран окъу, сууаплыкъ ал,
Кесинги ахыр юйюнг мындад, факъыр!

1934