Айтама, тынгылагъыз сиз,
Бирлик ишде товарищле,
Ленин къалай жюрютгенин
Эркинлик ючюннге ишле.

Сабийликден окъуй кетди,
Аны бийигине жетди,
Дуниядан патчахлыкъны
Тайдырыргъа мурат этди.

Башлады андан аямай,
Къара халкъгъа хапар берип,
Аны ючюн кёп къыйналды,
Тутмакъ да, сибир да кёрюп.

Андан да къутулуп келди,
Барып кёрдю къыралланы,
Излеп, табып, жыйын этди,
Жигит, батыр уланланы.

Жашырынлыкъда кёп ишлеп
Турду къадар заманланы,
Бийликледен чыгъарыргъа
Байла бла Романланы.

Ишчи, элли бир болдула,
Къолгъа сауутну алдыла,
Ленинни ызындан барып,
Патчахлыкъны аудурдула.

Ленин эди ишни къургъан,
Залимликге ёртен салгъан,
Эслиликни отха атхан,
Жангылыкъны чархын бургъан.

Патчахлыкъны кир къаласын
Кёп кюрешди да, чачды ол.
Жарлы халкъгъа эркинликни
Эшигин кенгнге ачды ол.

Ленинди – тюзлюкню жолу,
Жокъду адам андан уллу,
Аны жолу бла барыр
Ёмюрледе адам улу.

Ёлдю Ленин – бачамабыз,
Бачаманы унутмабыз.
Жарлы, жалчы тынгылагъыз,
Кязим айтханны ангылагъыз:

Душманлагъа алдатмагъаз,
Бай, бий ызындан бармагъыз,
Бош керекисз къыйналмагъыз –
Ауар ташха тыянмагъыз.

Оюлмазлыкъ къая – Ленинд,
Адам игиси – ленинчид,
Ленин – батмазлыкъ кюнюбюзд,
Партиясы – чигинжибизд.

1924