 |
Кязим Мечиев - Этгенле - Бегиев Абдуллах эм башхала. |
Балам, жугъутур уугъа чыгъаса,
Жюрегим къайгъыдан толад.
Чынгылла тумандан толудула,
Тауда къар бугъой кёп болад.
Балам, уллу къар жауады тауда,
Анангы жюреги жанад.
Къыш къаяла учхалауукъдула,
Чынгыл башында жол да тард!
Балам, бу къар кюн уугъа кетесе,
Жарлыд мараучу анасы.
Къанлы жауубуз барлыкъ жолунгда.
Билей болурму къамасын?
Балам, апсаты эшитсин анангы
Жарсыуун бла тилегин!
Ол санга иги кёзден къарасын,
Сенсе да жангыз билегим.
Балам, бюгюн таула къаштюйдюле,
Къар жауады бир эринмей,
Мен бу дуниядан алай кетейим,
Сени ачыуунгу кёрмей!
1912
| 
