Айтама, къулакъ салыгъыз,
Хатадан кери къалыгъыз,
Сёзюмю эсге алыгъыз,-
Адамды бизни атыбыз.

Бийикдиле тауларыбыз,
Бек кёпдюле жауларыбыз,
Эшитилселе дауларыбыз,-
Адамды бизни атыбыз.

Жерибиз аз, кёп ташыбыз,
Такъырды бизни ашыбыз,
Дагъы тёзеди жаныбыз,-
Адамды бизни атыбыз.

Юркген сюрюулей халкъыбыз,
Жокъду онгубуз, хатыбыз.
Толмайды кёп муратыбыз,-
Адамды бизни атыбыз.

Зулмугъа жетмей къарыбыз,
Къайнайды къызыл къаныбыз,
Да бюкмез палах – къанлыбыз,-
Адамды бизни атыбыз.

Кърангыды ёз халкъыбыз,
Бирликди тутхан антыбыз,
Келгенге барды хантыбыз,-
Адамды бизни атыбыз.

Бек кёпдю затыбыз,
Азлыкъда чомартыбыз,
Кетмесин бу къууатыбз,-
Адамды бизни атыбыз.

Алгъа барайыкъ сурап ыз,
Кёп къыйналса да жаныбыз,
Толур бир кюн муратыбыз,-
Адамды бизни атыбыз.

1908