Дуния къан урушха киргенд,
Тынчлыкъны атасы ёлгенд,
Патчахха аман кюн келгенд,
Халкъны халкъгъа душман этгенд.
Жашла урушха къалалла.
Анала жашсыз къалалла.
Халкъгъа налог кёп саллалла,
Жюрекле ачыудан жаналла.
Къалмагъанд дунияда тынчлыкъ,
Къалмагъанд бизде къууанчлыкъ,
Жетгенд бизге жаланнгачлыкъ,
Келир деп къоркъама ачлыкъ!
Дуниягъа келгенд къара кюн,
Кёп бушуу берген – къара кюн,
Сыйыт этдирген – къара кюн,
Жерни кюйдюрген – къара кюн.
Биз барын да кётюрюрбюз,
Ёлгенлеге да тёзербиз.
Урушха налат берирбиз,
Ачылыр бизни кюнюбюз.

1914