Хар назмучу, закийме — дей болур кесине?
Фахмусузма — дерге, кимни келир эсине?
Мен кесиме айталмайма, фахмусузма — деб,
Сора, кимге айталлыкъма, къой, сен джазма — деб.

Халкъ тёлерге барыбызгъа къайдан табсын хакъ?
Джазыучусу аслам болгъан, ол — къыйынлы халкъ!
Кёбюсюне, бетсизлик бла алад хакъ алгъан,
«Халкъым мени ангыламайд!..» — дейд хакъсыз къалгъан.

Хар джаннга да фахму къайдан берсин табигъат?
Бек кёблени бек терилте эсе «поэт» ат,
Кюрешейик башыбыз бла этиб къазауат!
Багушда да табылыучанд бир джараулу зат.

«Алай эсе, биз джазайыкъ излемейин хакъ!
Заман джетсе, хар инсанны хакъын берир халкъ»,—
Дейме бирде, айтханыма ийнанмай кесим,
Худжу хакъгъа, сый-махтаугъа бёлюнед эсим...

1979 дж.