Тур, джашчыкъ, ёрге, нюр танг атады,
Таза хауаны бир солу!
Кирпиклеринги ёрге тартады,
Хур тангны чыммакъ-акъ къолу.

Тур, джашчыкъ, ёрге тур, гёджеб бала,
Къанау джукъуну сен бир джыкъ!
Эки къолунга спорт керек ала,
Эшик аллына, хайда, чыкъ!

Кюн чыкъгъынчыгъа тургъан адамды
Баш тутуругъу дунияны!
Бу танг, джандетча, бир ариу тангды!
Тур, джашчыкъ, бир кёр сен аны!

Мюйюзлери бла кюнню кёлтюрюб,
Тауну башында джугъутур,
Тау элге къараб, джукъунгу кёрюб,
Айыб этеди, хайда, тур!

Омакъ кюйюзде кюмюш къамача,
Тауну белинде акъ чучхур,
Кюн тийгенлей а, кёзюнг къамарча
Джылтырарыкъды, джашчыкъ, тур!

Кёр ариулукъну Джуртда, тыбырда...
Амал бар кюнде бер багъа!
Чырт турур мадар джокъду къабырда
Дайым джукълагъан Аппагъа.

1993 дж.