Джукъум къалыб, эсим кетиб,
Мен тамам азгъанем,
Кёб заманны кюреш этиб,
Бир китаб джазгъанем.

Китабымы халкъгъа сатыб,
Хакъымы алгъанем,
Хайт деб, ачхачыкъгъа батыб,
Бочхама салгъанем.

Махтанайым кемпирге деб,
Юйге тебрегенем.
Мен да юйге джете тебреб
«Бирге» тюбегенем.

Джылау этди, антха джетди,
Ёнгкюч ачха бер — деб,
Бергенимде, махтаб кетди,
Сенсе керти эр! — деб.

Юч кюннге... — деб этгенед ант,
Озду отуз ай да.
Аллай бирге болуред ат
Ол кюн туугъан тай да.

Тасды. Къайтармайды артха.
Заран тюшюргенме.
Бу джашауда мен бир затха
Тамам тюшюннгенме:

Чомартма деб, хар джетгеннге
Къучагъышы керме!
Садакъа бер бир хашгеннге,
Ёнгкюч ачха берме!

1989 дж.