«Поэт» атны джюрютюучю устазларым,
Дерсим ючюн «тюйселе» уа, ол сёзмед?
«Джау» болгъалла къралгъа сени назмуларынг!» —
Деб айталла. Джюрегим а: «Бек тёз!» — дейд.

Джансыз кёзле ушайдыла миялагъа,
Сёзюм кесин ол кёзлеге ургъанча...
Чыгъама деб чыпчыкъ джарыкъ дуниягъа,
Терезеге кесин уруб тургъанча,

Кюрешеме. Ал бермейле сёлеширге —
Джарсыулары миллетими, джерими...
Тюйюшмеген юренмейди тюйюшюрге, —
Деб, кёл эте, мен сюртеме терими.

Сууукъ кече мен чегетде аджашханча,
Къарангы да этедиле кёзлерим.
Къарангыда сокъур болгъан чыичыкълача,
Учадыла мени джууаб сёзлерим.

1983 дж.