Кёзю бузлу, сёзю тузлу — ит заман!
Ит замандан ашхы эди бит заман!
Бит заманда халкъ бир-бирин къабмаед.
Нафыс халкъны эшиклерин джабмаед.

Ийнам джокъду, ийман джокъду — баш палах!
Джорукъ джокъду, тёре окъду, хей Аллах,
Джарлы халкъны СЕН эсинден нек кетдинг?!
Сюймегенле табасы уа нек этдинг?!

Кяфырланы насыбларын нек кердинг?!
Джахиллеге СЕН оноуну нек бердинг?!
Нек чыгьардынг бетсизлени ал сафха?!
Намыслыны нек ыхтырдынг эм артха?!

Кеч, Аллахым, сёзюм ауур тиймесин...
Джетерикди!.. Халкъым къара киймесин!
Халкъгъа къайтсын эртдедеги намыс, бет!..
Я. Аллахым, тилегими къабыл эт!

1992 дж.