Къартмы болдум мен асыры эртдеден?
Джюрюгеним келишмейди заман бла.
Дуния малны кемсиз сюред джууукъ-тенг,
Сюред амал билмеген да аман бла.

Ойрасы:
Алдау, урлау,
Болду махтау.
Тюз халал иш,
Болду бедиш.
Сыйсыз саналды джигитге,
Намыслы уа — къанау итге.

Дуния малны башларына салгъанла,
Гебен тюбде тууарлагьа ушайла.
Миллетим — деб, айталмагъан джалгъанла,
Манкъурт болуб халкъны этин ашайла.

Ойрасы.

Халкъ билмейди не кюнлеге джетерин...
Эгеч, къарнаш, джууукъ, тенг деб къарамай,
Кёб адамла къырлыкьдыла бир-бирин,
Аллах, болуш, онгсуз халкъны марамай!

Ойрасы.

1992 дж.