Саулугъунга тамам баз...
Келгенлейине джашил джаз,
Къачха дери джерни къаз,
Не кюн сайын назму джаз,
Джаза-джаза бетинг саз
Болгъанлыкъгъа, ачха аз!

Мутхуз болду кюнюбюз,
Тюшюбюзча — тюнюбюз,
Ёте хар бир кюнюбюз,
Азыб-тозуб этибиз,
Кетиб бизни бетибиз,
Тоюмсузму болдукъ биз?

Эркишибиз, тишибиз,
Тынчлыкъ табмай кишибиз,
Чабханлыкъгьа, ишибиз —
Къум элтгенча къум тюзге,
Суу къуйгьанча тенгизге...
Оноу керекди бизге!

Дуния малдан болмай токъ,
Кюлюрге да заман джокъ,
Ёлюрге да заман джокъ!
Гинасуучад эсибиз!
Бу барыудан барсакъ биз,
Мал боллукъбуз кесибиз!

1992 дж.