Тау халкъыма келген ачлыкъ ушады,
Ышанына джетген джити садакъгъа.
Ючден бири къырылса да, джашады,
Бир кишиден тилемеди садакъа.

Джаханимден къайтханында, халкъымда
Бар эдиле анда-санда бир байла.
Ийнаныгъыз, къуран-межгит хакъына,
Джокъ эдиле, джокъ эдиле «шабайла»!

Джюреклеге байракъ этиб нафысны,
Бир къауумла атхандъша бетлерин.
Чагъыр джууа башлагъанды намысны
Бусурманлыкъ салгъан шыйых чеклерин.

Ана тилде, «бир шишалыкъ берсенг» — деб,
Анда-санда айтханлагъа эс ийиб
Тынгыласам, вокзаллада тёнгереб
Турурламы таулу джашла эсириб?! —

Деген сагъыш, джыламукъча, мыйыма
Къуюлады, тунчукъдура эсими...
Динсиз къралны джоругъуна сыйына
Нек джашайма?! — деб, терслейме кесими.

1990 дж.