Бу хапарым джомакъ тюлдю, бу кертид...
Бёрюлени кюеулери — бир къарт ит,
Ахлыларын сата, орнун тёр этди,
Бир кюн бир джаш итге былай юретди:

«Келе эсе семиз этле тишлеринг,
Келе эсе къуллукълада ишлеринг,
Излей эсенг сен атларгъа сыйдам джол,
Мадар таб да, бёрюлеге кюеу бол.

Кючюкчюгтонг болса, ёсер да джетер,
Ит джыйыннга бир кюн оноу ол этер,
Бёрю джыйын аны ит бла тенг этмез!
Бёрю къыздан туугъан итте ит джетмез!..

Кючюкле да бёрюле бла джалгъаша,
Джашаулары бола барыр тамаша!..
Ит деген бу сыйсыз атдан солурла,
Туудукълары бёрючюкле болурла!

Ма бу сыйлы ишни аллын башлагъан,
Аман-Тишли бий парийге ушагъан
Бюпон сенсе! Ит атынгы бёрю эт!
Ашхы джолгъа! Муратынга толу джет!»

Джаш ит ма бу татлы сёзге бёлениб,
Бёрюлеге кюеу болуб, кёллениб,
Татлы ашаб, бёрю къыз бла джатады,
Бёрю къаннга кириб, Джуртун сатады.

Бир кюн итле адамла бла болуб бир,
Къоркъмай, юркмей къолгъа алыб таш, темир,
Сатлыкъланы къырмасала аямай,
Ит юзюкню арты болур кёб бармай.

1981 дж.