Чырмау чыгъыб ёлген эди миннген атым,
Барыргъа уа керек эди — джаяу къалдым.
Атлыла уа мени къоюб кетгенелле,
Ким биледи, къалайлагъа джетгенелле?
Эшекде баргъан да мени оза эди,
Алгъа чыкъгъан меннге «уру къаза эди».
Сен ызымдан келе эдинг, джел этдире,
Адежингде джюз ат джерни тебрендире,
Мени кибик джаяуланы атлы эте...
«Мин бир атха» — дединг, сен къатыма джете.
«Танышайыкъ, онгсузлагъа джакъма» — дединг,
«Алай а, мен атларыма сакъма» — дединг,
«Бу дунияда кишиге да ышаныу джокъ,
Игилигинг кесинге да болуучанд окъ.
Ким биледи, къолугъузгъа джетсе джюген,
Артда сизни, атланы да табалмам мен,
Аны ючюн, сол къолунга бугъоуну сал,
Къыйырын а къашха бегит, таякъны ал
Онг къолунга, джол къоркъуулуд, джау да чабар...»
Оноуунга бой салмазгъа джогъед мадар,
Арыгъанем ёмюр джолда джаяу бара,
Бек кёб атлы озгъан эди, джюрек джара.
«Сизни атха миндиргенни эсгеригиз,
Хар адам да эшитирча сый беригиз,
Мен ангылар тилде алай сёлешигиз,
Бир-биринг бла тюйюшмегиз, ёчешигиз,
Ёчешиуде тюб билгенлей манга айтыгъыз...
«Кесим» сёзню эсигизден узайтыгъыз,
Эртде тюшген джараланы унутугъуз,
Ата-баба адетлени къурутугъуз,
Джоругъума сыйынмагъан — къанлы джауум!
Ычхыныргъа излегененг, кёбдю дауум!» —
Дейсе бизге, айтмасанг да ачыкъ алай,
Андан башха ангылайым мен а къалай?!
Азатлыкъгъа чыгъалмайма — бугъоу къолда,
Мен шашаргъа башлагъанма зорлукъ джолда!
Бошла — десем, темир бетге киресе сен,
Меничала бошлансала, сен сау-эсен
Баралмазса, алайчыгъын билесе бек...
Мен а, атха нек миннгенем бир айтчы, нек?!
Ычхыналсам, тайым барды, ат этерме,
Сора, мен да муратыма бир джетерме.

1981 дж.