1.
Миллетим! — дей, къолдан уллу зат келмей...
Миллетими шыйых этиб джашадым,
Миллетими джауларына бетсинмей,
Назму джаза, суу бла ётмек ашадым.

Бир адамны ашамадым къыйынын,
Алдамадым, урламадым кишиден,
Тюшюрмедим миллетими да сыйын,
Уллу хайыр табмасам да ишимден.

Америка, Тюрк кърал мени джырыма
Сый бердиле, «къал бизде» — деб, айтдыла,
«Буруш» халим тарта баба сырыма,
Тиним, саным Къарачайгъа къайтдыла.

2 .
Бюгюн тюбеб миллетимден бёлек джаш,
«Джырла! Бизге алгъыш айт!» — деб, буудула.
Мен орамда джырламайма! — деб кёз — къаш
Бермедим да, тёрт джанымдан урдула.

Къарыуумча мен да урдум аланы,
Болушлукъ! — деб къычырмадым кишиге,
Тюйюб алгъыш айтдыралмагъанланы
Тогъузун да санагъанма тишиге!

Аланы къой, ала — джыртхыч чакъанла!
(Бюгюн кесим тющцюм деб тюл ортагъа)
Бюгюнлюкде бир-бирин таныгъанла
Сый ючюн деб кирлик тюлле орчагъа.

3.
Быллай кюнде бояа болур белгили
Халкъда болгъан сыйы хар бир инсанны?
Мен алгъанма бюгюн болмай экили
Джашаууму сакълар ючюн къаманы.

Аш бла урлукъ тюлме таш бла ургъанны,
Уруб къолун тюшюрлюкме джеталсам!
Тамбла къалай дерме? Билмейме аны...
Ачыууму бюгече сёл эталсам...

Кёлеккеми къышхы кече толгъан ай,
Ушатханды аугъан ёре турукъгъа,
Кёлеккеме соруб, джууаб табалмай,
Сюелеме, атлаялмай мен джукъгъа.

1992 дж.