Алан халкъны аслан кёллю баласы,
Тау намысны оюлмазлыкъ къаласы,
Хар не тюрлю хазнадан да джеринг бай,
Акъыл сёзлю, дугъум кёзлю — Къарачай!

Тау башлада эримеучю къарынгы,
Субай санлы джашил наратларынгы
Тоялмайма кёзлерим бла ийнакълай,
Акъ башлыкълы, джашилчепген Къарачай!

Апма терек чакъгъан кюнде, эшикде
Джукълаб тургъан балачыкъны бешикде
Тылпыуундан тогъугъанча, мен алай
Солуучанма тау хауангы, Къарачай!

Таудан саркъыб, кёкге чыгъыб джауарыкъ,
Ахыр кювде санларымы джууарыкъ
Сууларынгдан, мен ичеме тоялмай,
Ана кёлча таза суулу, Къарачай!

Саным сени топурагъынга къошулур,
Джаным сингиб тау хауанга, хош болур,
Аджалым да айырмазча, мен алай
Байланыбма сеннге, шыйых Къарачай!

Кёзбау сёзге сен бёлдюртме эсинги,
Сакъла, сакъла, Шам Къарачай, кесинги!
Сюрпонде да болмагъанды кёлюнг сай,
Ата Джуртум, Ана Сютюм — Къарачай!

Керек болса, амалчы бол, сен алай,
Терк бюгюл да, дженгил тюзел мычхылай,
Кес зорлукъну, сен ашыкъмай бек чъщай,
Хаман джылы болсун юйюнг, Къарачай!

Намыс болсун джюрек хантынг, Къарачай!
«Бирлик» болсун ёмюр антынг, Къарачай!
Бай тнлинги, хур дининги сакъла, джай!
Адам санынг минг къат ёссюн, Къарачай!

1990 дж.