Ма бу кече бир къарангы кечеди,
Букъдуралмаса да джюрек джарангы.
Танг кечени къара къанын ичеди,
Кёгереди къансыз болгъан къарангы.

Чырт эсине келтиралмайд сер башым...
Тынгысызма тас этгенча джугъуму,
Джуртха насыб излей кетген сагъышым,
Къалайлагъа алыб кетди джукъуму?

Джукъламайын чыкъдым энтда бир тангнга —
Деб, мен кимден излерикме бюсюреу?
Сый ким берир къол бла тутулмагъаннга?
Гырджын, кийим, кёзбау махтау — халкъ излеу.

Халкъ — джыйымдыкъ, миллет шарты джокъ аны,
Миллет деген — халкъ ичинде бёлекчик,
Ол джюрюйдю ауузундача къаманы,
Ол — Аллах бла халкъ ортада келечи.

«Миллет санда болгъан ием, къайтдым» — дейд,
Насыб излеб, къуру къайтхан сагъышым,
Белгисизлик джарсыуларын керелейд,
Умутундан мийик болур къарышым?..

Сау кечени бошха кетиб къыйыны,
Джангызлыкъгъа нёгер болду ол бюгюн,
Ушакълары мутхуз этед мыйымы...
Себеб берген — чыгъыб келген къачхы кюн.

1997 дж.