1.
Узун сакъалын мылы джел тарай,
Ёпкеси кюкюрт ийисни солуб,
Гуждар къаяны башындан къарайд,
Джити кёзлери бушуудан толуб.
Къая тапхырда юйюрю джатад,
Джукъгъан ауруудан бек онгсуз болуб,
Бир къарт эчки да ичин терк тартад,
Къатында улагъы солуусуз болуб.

2.
Чыгъыб келеди бир уучу тарны,
Тири къымылдайд, ач тюдцю къарны,
Этинден эсе азгъын гуждарны
Эки мюйюзю терилтед аны.
Гуджар эслемейд, хоншу къаядан
Бетджан салгъанды ол уучу анга.
Ма атды уучу солтан джаядан,
Окъ келиб тийди, бояды къаннга.

3.
Кёб да мычымай уллу джел къобду,
Кёк ачы чартлаб, джангур да къуйду,
Уучу да джаны къайгъъшы болду,
Гуждарны къанын джангур суу джууду.
Тайгъакъ этгенди джангур къаяны,
Энишге аз-аз таяды гуждар,
Джел да теберед артха гуждарны...
Къая къотурчукъ! Туягъы тутар
Мадар табыдды! Аягъын созуб,
Къатдырыб болгъан чабакъ этлерин...
(Былайтын алгъын ол чабыб озуб
Кетиучен эди сюре тенглерин).

4.
Бу къанлы болум эмсе да кючюн,
Гуджар джазыу бла ётгюр ёчешед,
Ачы джарасын унутур ючюн,
Кеси-кеси бла алай сёлешед:
«Бир тирил, марджа, ай хомух гуждар,
Апсаты ючюн тилейме сенден!
Бир къуджурд чынгыл, тюбю — чауул, джар,..
Сау сюегинг да къаллыкъ тюлд кетсенг!
Ёлген къыйын тюлд, онгсузунг къалса
Артынгда, ийнан, эки ёлюрсе!
Бу джол бир тирил, Апсаты алса
Джанынгы, ол кюн кёрге эркинсе!
Кесинг да джанлай билмединг окъдан,
Тёлюню кимге аманат этиб
Кетерсе? Кетсенг, ким билед артдан
Юзюгюнг къурурму, зорлукъ джетиб?

5.
Джел къуууб барады боз булутланы,
Кюн ачылады, къая да кебед.
Сылыт этгенди болум гуджарны,
Юйюрге къарай, джюреги тебед.
Болумдан къоркъуб онгсуз юйюрю,
Къысылгъандыла бир-бирлерине.
Фейруз таш кибик аламны нюрю,
Себеб болады джюреклерине.

1985 дж.