«Къызгъанчлыкъ бла чомартлыкъны
Ортасында джашагъандан
Тюз джашагъан адам джокъду!» —
Деучен эди мени Аппам.

Бир танышым тиледи да,
Бердим анга маркъа къозу.
Экинчи кюн салыб келди
Бузоу тилей, къолун созуб.

Бетим джетмей, бериб ийдим.
Къайтыб келди, ыйыкъ озуб,
Тай тиледи. Мен бермедим...
Ахырында кетди къозуб.

Экинчи кюн джолда тюбеб,
Салам! — деб, къолуму созуб
Кёрмегенимде, ол ёпкелеб,
Саламлашмай кетди озуб.

Мен ичимден айтдым: «Гырджын
Тилеселе, кетмем озуб...
Къозуну къой этмезликге
Ёмюрюмде бермем къозу!»

1979 дж.