Ой сюйдюм-сюйдюм, бир бек термилдим,
Сени кёлюнгю билмейин,
Къыйырында тохтаб нек къалмадым,
Былай тереннге кирмейин.

Ай мен джашагъан дунияда, анам,
Сюйгенимден ариу кёрмейме,
Алай кётенли болма, ариучукъ,
Сени амалтын ёлмейме.

Ол кёкде баргъан кёк кёгюрчюн,
Къанатын къакъды чалманнга,
Бир кёб ауруб, бир кёб термилиб,
Мени кюсегин дарманнга.

Сеннге къыйналгъаным кёбдю
Меннге былай азаргъа,
Баргъан Къобан мерекеб болсун,
Тарыгъыуларымы джазаргъа.

Эшик аллында вишня терекчик,
Бир ариу чыммакъ чакъгъанды,
Сеннге тарала, сеннге термиле,
Джюрегим ауруу табханды.

Сени къолунгда джюзюкчюгюнг
Алтыны барды ташында,
Сюймегенни сюйюб неге кюрешеди,
Акъылы болгъан башында.

Кюн бюгюн бир ариу тийгенди,
Тауланы, ташланы джарытыб,
Сен ариучукъгъа ашыгъыб келеме,
Миннген атымы арытыб.

Къалын тубанла басыб келелле,
Ма ёзенлени къаралтыб,
Къачаннга дери турлукъса, ариу,
Мени кесинге таралтыб.

Башынгда сени чилле джаулукъчугъунг,
Бурулуб тюшсюн бойнунга,
Уллу джыланла кириб джатсынла,
Менден аягъан къойнунга.

Ийнарларымы айтыб тебресем,
Борбайларынгы къыярма,
Сюймеклигими айтыб джыласам,
Барлыкъ джашынгдан тыярма.

Ах, сеннге письмо джазарыкъма, джаным,
Сау тетрадны толтуруб,
Сюймеклигими айтыб тебресем,
Джыларса, къатыма олтуруб,

Джашлай сюйгенме сени, ариучукъ
Джаш санларымы кюйдюрюб,
Сабий санларымы саулай эритдинг,
Кесинги меннге сюйдюрюб.

Бу сюймекликден джокъ эди хапарым,
Ах,эндилеге деричин,
Чыдаб къолумдан келмей къалгъанды,
Сени сюйгенли беричин.

Къара къашларынг, къара кёзлеринг,
Джюрегиме ауруу береди,
Кече да, кюн да бир да тохтамай,
Тауушунг къулагъыма келеди.

Джюрек сюйгенни къол да таныйды,
Таймай джазама атынгы,
Тансыкъ болсам, къараб турурма,
Джибермей къойма картынгы.

Кюнюне эки къалай барайым,
Къарагъан халкъдан уялмай,
Къатынга барсам, джылаб къоярыкъма,
Джаш джюрегими тыялмай.

Туурангдан къараб чыдаялмайма,
Мени олтурт, бала къатынга,
Толгъан ай, ой джарыкъ джулдуз,
Къайсын айтайым атынга.

Мени аягъым джетмеген бир джер джокъду,
Тургъан элими ичинде,
Сени бла сёлешиб, алай кёргенме,
Бюгече джукълаб, тюшюмде.

Мен ёлмей дунияда джашасам,
Этген муратыма джетерме,
Ма буэки-юч ийнарчыкъны,
Ариучугъум, сеннге этгенме.

Мен бир джары кетген заманда,
Бу эки-юч ийнарчыкъны джырлай тур,
Мен кетсем да юйюбюз сауду,
Унутма да къарай тур.

Мен кесим джангыз юйде олтурсам,
Таймай тюшесе эсиме,
Джанымы алыб сеннге иерем,
Джаннга не этейим кесиме.

Мен сени сюйюб айланнганымы
Саулай юйюбюз билелле,
Сени картынгы къараб кёргенлей,
Къууаныб ала кюлелле.