Алгъа чыкъмай, артха къалмай барыудан,
Къатышханды тюнюбюз бла тюшюбюз.
Къоркъа-къоркъа эрикгенбиз къоркъуудан,
Къоркъургъа да къалмагъанды кючюбюз.

Не кёрмедик, сыйына бу джорукъгъа,
Солуу табмай баргъан сюрюу кибик биз?!
Санларыбыз бой салалла буйрукъгъа,
Бойсунмайын джукълагъанды тинибиз.

Кюиден-кюннге ийнамыбыз аздан-аз,
Ийнамсызлыкъ — келечиси ёлюмню!
Ай тутулса къакъгъан къартча дауурбаз,
Къаты джырлаб къандырайым кёлюмю.

Ким биледи, уянырмы джырымдан,
Къатымдагъы бара тургъан бир белек?
Ма тийгенди къамчи мени сыртымдан,
Къалай мутхуз кёрюнеди тёгерек...

1983 дж.