Эртделеде, джазгъы кюнде,
Кёлюбюзню айта эдик,
Сагъышлада уча бирде,
Бирде джерге къайта эдик.

«...Сюймеклигим чырт орнундан
Тебмез тауду!» — деген эдим,
«...Сюймеклигим чыммакъ акъды —
Акъ булутча!»—деген эдинг.

«Акъ булутну» башлыкъныча
«Таугъа» бошчукъ къысхан эдинг,
Зарлыкъ сёзден, джелден кибик,
Сюймеклигинг учхан эди.

Булут кетиб баргъанлыкъгъа,
Тау кетгенча кёре эдинг,
Экибизден тюзге, терсге
Сокъур къадар тёре эди.

Сюеледи сюймеклигим
Энди, къачхы джелле тарай,
Булутланы ичлеринде
Акъны кёрмей, мыдах къарай.

Саргъалгъанды къачхы джелге
Къаджау тура кёк джашлыгъым.
Айт, къайдаса, джелле сюрген
Акъ булутум —акъ башлыгъым?

1978 дж.