Мен айтайым, тынгылагъыз,
Таулу юйде туулса къыз,
Сый этип, сиз къууанмагъыз,
Бош муратха жубанмагъыз.

Хадиследе кёп окъудум,
Барып кёрюп, арсар болдум:
Тиширыугъа жокъду болум,
Жазаргъа тартынад къолум!

Къыйыннга деп тууар жаны,
Тюзелмез аны бир саны.
Кюе кетер жюрек къаны,
Муратлары толмай къалыр.

Къууанмазла аталары,
Мудах болур аналары,
Кюню, тюню жиляй барыр,
Муратлары толмай къалыр.

Жашлы юйню ким да таныр,
Келген къонакъ кече къалыр,
Атасы байгъа саналыр,
Жуукълугъун ким да алыр.

Жылы жетсе, тыякъ алыр,
Жыйын бла чалгъы чалыр,
Къыйын ишге кючю къарыр,
Юй ишлерге таш къобарыр.

Жигитлиги терк танылыр,
Иги къызны сайлап алыр,
Жаратмаса, талакъ салыр,
Башха къызны тилеп алыр.

Къызлы юйге кёз къарамаз,
Келген къонакъ кече къалмаз,
Сууу-эркин, отуну – аз,
Берекети бир да болмаз.

Элде жарлыгъа саналыр,
Ашда ол садакъа алыр,
Жууугъу да келмей къалыр,
Жолну кенгден узакъ салыр.

Айтды, баям, халгъа тюшюп,
Къызлы ата – кюйюп, бишип,-
Тиширыуну къыйын ишин,
Ёмюрледе бу келишин:

Къыз туугъаннга къууанмагъыз,
Бош акъылгъа жубанмагъыз,
Анга чюйре ийман, фарыз,-
Къыйынлыкъгъа келед хар къыз!

1896