 |
Кязим Мечиев - Этгенле - Бегиев Абдуллах эм башхала. |
Къуллукъчу большевик жашла –
Бизге халал къарындашла!
Бард алада къалын башла,
Ала бизге тенг жолдашла.
Къаты тутуп законланы,
Кёп ачып кенг школланы,
Кенг ишлетип тар жолланы,
Кёп этип колхоз малланы,-
Оноуну этелле бирге,
Тюзню кётюрелле ёрге,
Душманны кёмелле жерге,
Быланы сен ариу терге.
Эски адетни къалдыралла,
Айтханларын бардыралла,
Тутхан ишлерин болдуралла,
Халкъгъа билим алдыралла.
Ишлеринде бек усталла,
Байны, бийни кенг къысталла.
Халкъны къууанчлы туталла,
Мудахланы жарыталла.
Къуллукъчу большевик жашла –
Бизге халал къарындашла!
Бард алада къалын башла,
Ала бизге тенг жолдашла!
1926-1938
| 
