Бир бёлек сёз мен айтайым
Жашауну тюз барыуундан,
Аны къууанчлыгъын сынап,
Жюреклени жарыуундан.

Биз ырахатлыкъ тапханбыз
Оноуланы ариуундан,
Жашауубуз токъ болгъанды
Советлени къарыуундан.

Бизден кетди къайгъы, къаугъа,
Келди бизге уллу саугъа,
Биз чыкъгъанбыз тынч жашаугъа
Жетгенбиз уллу ашаугъа.

Ёрлегенбиз бийик таугъа,-
Бек устабыз иш къураугъа,
Онг бермебиз бизге жаугъа,
Ийнанмабыз бош сылтаугъа.

Бизде барды уллу къарыу,
Тынч болгъанды иш мажарыу,
Хар ишибиз болду ариу,
Жюрекледе барды жарыу.

Сау дунияда баш болгъанбыз,
Оноуну тюзюн алгъанбыз,
Бек жарашып къуралгъанбыз,
Аскер кючню деу салгъанбыз.

Энди бизни киши озмаз,
Бир жау бизге билек болмаз,
Къатылып ол намыс алмаз,
Къатылса да, ол сау къалмаз.

Жюрегибиз токъду бизни,
Къоркъууубуз жокъду ачха,
Малыбыз, жерибиз кёпдю
Иебиз биз кенг къууанчха.

Алгъын болгъан аман халла
Бары унутулуп къалгъанды.
Къыйналып этилген ишле
Ишлерге бек тынч болгъанды.

Халкъгъа машинала жайып,
Хар ишни терк, тынч этдирип,
Жюз адам ишлерик ишни
Жангыз машина битдирип;

Эшек ётмеген тарладан
Машиналаны ётдюрюп,
Жыйырма тёрт сагъат жолгъа
Жангыз сагъатха жетдирип;

Телефондан сёлешебиз
Къошдан биз Нальчик городха,
Соруп жууабын алабыз
Мычымайын бир минутха;

Хар керекни тынч табабыз,
Ары-бери къармалмайын,
Атланып чыгъабыз жолгъа
Бир минутха чырмалмайын!

Бар ахшылыкъланы барын
Халкълагъа ариу кёргенди,-
Насыплыкъны, къууанчлыкъны
Бизге партия бергенди.

Энди биз тилейбиз сюйюп,
Партиягъа узакъ саулукъ,
Тутхан иши кючлю болуп,
Насыплыкъда кёп жашаулукъ.

Жашасынла тюз законла,
Бизге тап жашау салгъанла.
Кёп халкъладан Кязим иед
Партиябызгъа махтаула!

1939