Жахил айтыр сёзюн тапмаз,
Туура сёзге жакъ да басмаз,
Айыплыкъдан къоркъуп къачмаз.

Жумуш айтсанг, жиляр, тыкъсыр,
Тилкъауланыр, тутур, мычыр,
Билимлини кёрсе, жунчур.

Иги сёзню сыйын билмез,
Бир тутханын ёлсе иймез,
Киши айтханны да сюймез.

Артдан аны сёзюн къатлар,
Анга ушаш айтыр, атлар,
Жиляр жерде кюлюп къатар.

Бузуп чыгъар элни тоюн,
Бушуулада этер оюн,
Бек къатыды анда боюн.

Ашха жетсе, аман ашар,
Шытыларын кенгнге чачар,
Аны кёрген туруп къачар.

(?)