«Эшекни кючю халал,
Сютю харам», - дейдиле.
Сен жарлыны жегелле,
Сора тутуп тюелле.

Сенсиз да болалмайдыла,
Журтубузда таулула,
Аманнга «Эшек кибик»,
Деп къоядыла ала.

Туякъларынг тиймеген
Таш болмаз бу жоллада,
Сен бармагъан жол болмаз
Бу тарлада, къоллада.

Жарлы эшек, жауур эшек,
Иенг не аман эди!
Жауур этмейин жексе,
Юйюмю къуругъан эди!

Эки къулагъынг салпы,
Мудах болуп тураса,
Кёп артыкълыкъ сынагъан
Сен да бир жарлы жанса.

Назмум жауурунгу сау
Эталмазын билеме,
Алай санга къайгъырып,
Чыдаялмай этеме.

Тил билмейсе, жарлы сен,
Назмуму ангыларча.
Мени къайгъырыу сёзюм
Санга асыу болурча.

1912