|
Ёзденланы Альберт - Чолпан. |
«Текеле бла къочхарла» деген спектаклъге джазылгъан джыр.
Сюрюуюбюз айтсын энчи шартларын:
Бизни сюрюу сюрюуледен сюрюудю!
Эркечлени этгенбиз да артларын,
Джюрюуюбюз бирден-бирден джюрюудю!
Аз да алгъа чыкъгъанны,
Энчи сокъмакъ салгъанны
Айыргъанбыз, айырлыкъбыз чатларын!
Бизни сюрюу джут тюлд джемге, биченнге,..
Къачдан джазгъа къаудан бла да чыгъарбыз!
Баула джокъну санамайбыз истемге,
Къыш чиллени бойнун буруб джыгъарбыз!
Тёзюмлюлюкге уа биз,
Чыртданда тергелмезбиз
Мийикледе кийикледен бир кемге!
Не да болсун, суудан токъду къарныбыз,
Суу бузласа, биз къардан да къабарбыз!
Африкадан эсе кёбдю къарыбыз!
Къардан тоюб, бешден-бешден табарбыз!
Табарыкъбыз кёб къозу,
Австралияны озуб,
Къууанч эте, кёкге джетер башыбыз!
Бу барыудан барсакъ, озуб дунияны,
Туз орнуна шекер, не бал джаларбыз!
Бизни балды балы Ахмат къаяны!
Андан джалаб, Марсха чыгъыб отларбыз!
Къой Джолгъа саллыкъбыз джол,
Истем тюлдю бизге ол,
Джол саллыкъбыз, хорларыкъбыз аламны!
1985 дж.
|